Rajasthan doctor-te’n a huhoin chawlh la

Rajasthan-a sorkar doctor-te chuan an thil phut nawrna atan nimin khan a huhoin chawlh an la.

State sorkar hnuaia doctor 10,000-te’n an thil phut zingah hian rural allowance tihpun, hri inkaichhawn theih veite enkawl man a hrana allowance siamsak te a tel a ni. All Rajasthan In-Service Doctors Associa­tion president, Dr Ajay Chaudhary chuan state sorkarin an thil phutte hi a ngaihsak loh avangin chawlh laa an nawrh mai a ngai ta tih a sawi. An pawl chuan health department hnenah an thil phut 33 an thehlut tawh tih a sawi a, August 29 khan official-te nen meeting neiin a thuphungin inremna an siam tih a sawi.

Official-te chuan an thil phut tihhlawhtlin nan ni 15 hun pe turin an ngen a, mahse hemi chhung pawh hian hmalakna engmah a awm loh avangin a huhoin chawlh an la ta niin Dr Chaudhary chuan a sawi. Rajasthan Health Minister Kali­charan Saraf chuan sorkar chuan doctor-te thil phut chu tihhlawhtlin dan ngaithuahin hma a la mek tih a sawi a, an hna thawh chhunzawm turin a ngen.