Ghulam Nabi Azad-a'n a party din hming a puang

Congress party chhuahsantu, Jammu and Kashmir chief minister hlui Ghulam Nabi Azad chuan nimin khan Jammu-ah political party a din thar hming chu 'Democratic Azad Party' a nih thu puangin, party flag a tlangzarh nghal bawk.

Azad chuan party thar hming tur hian hming 1,500 vel rawtna a lut niin a sawi. Party hming atan chuan democracy lanna leh independent tak an duh tih sawiin, 'Democratic Azad Party' tih chu an hmang ta niin a sawi.

Party flag pawh tlangzarh nghalin, rawng chi thum - mustard, white leh blue a ni. Mustard colour chuan mi hrang hrang inlungrual leh inpumkhatna, a var chuan muanna leh a pawl chuan zalenna leh suangtuahnate a lantir a ni, a ti.

Kum 73 mi, Ghulam Azad hi hun rei tak a lo awm tawhna, Congress party aṭangin a bang a, Congress party chu a chhe tawh nia sawiin, party president hlui Rahul Gandhi chu party kalphung leh inenkawl dante tichhiaah puhin nasa takin a sawisel zui a ni.

Congress party a chhuahsan hnua Jammu-a public meeting a neih hmasak berah, Azad chuan political party thar a din tur thu leh, Jammu and Kashmir state pek leh an nih leh theihna leh, a mi chengte chanvo dik tak pek an nih theihna atana beih chu a party tharin a tum ber tur a nih thu a sawi.

Azad-a thlawptu, Jammu and Kashmir-a Congress hruaitu eng emaw zat, minister hlui leh MLA hluite pawhin Congress hi chhuahsanin an zui ve nghal a ni.