Mukul Rohatgi-a'n AG post a hnawl

Senior advocate Mukul Rohatgi chuan sorkar laipuiin Attorney General of India atana dah a tumna chu a hnawl.

Rohatgi hian a hmain AG-a dah tumna hi a lo remti tawh a, mahse a inngaihtuah nawn leh hnuah a rilru thlakin he post hi a hnawl tih a sawi.

AG nilai, kum 91 mi KK Venugopal-a term hi September 30 hian a tawp dawn a, a thlaktu atana Rohatgi an ruatna hi pawm se chuan AG 16-na leh, he post a chelh ṭum hnihna tur a ni ang. Kum 2014, June aṭanga kum 2017, June thla chhung khan AG post hi a lo chelh tawh a, Venugopal hian a thlak a ni.

AG hi India rama law officer dinhmun sang ber niin, sorkar laipui chief legal advisor angin a awm a ni. Supreme Court leh High Court-ahte sorkar laipui aiawhtu a ni a, Parliament in hnihah thu sawiin, rorelnaah pawh a tel thei a, mahse voting power erawh a nei ve lo. Ram danpuiin AG post chelh thei chin kum bithliah hi a siam lo.