Covid-19 vaccine dose 3-na la an tlem

India ramah Covid-19 dose thumna, precautionary dose tih bawk la an la tlem hle. Vaccine dose thuma pekchhuah ṭan a nih aṭanga thla kaw hnuah pawh, puitling la thei zingah 22.24 chauhin vaccine hi an la a ni.

July thla aṭang khan sorkar laipui chuan India zalenna champha vawi 75-na lawmna pualin, ni 75 chhung atan precaution dose hi a thlawnin a pe chhuak bawk a, a thlawna lak theih hun hi September 30-ah a tawp ang. A thlawna pek chhuah a ni chungin vaccine dose thumna la hi a la thei chin hmun ngaa ṭhena hmun khat vel chauhin la an awm.

Union health ministry-in a tarlan danin, kum 18-59 inkarah precautionary dose la hi vaibelchhe 13.53 an awm a, hei hi 17.58% an ni. Kum 60 chung lamah vaibelchhe 6.66 in an la tawh a, 48.5% an tling tawh thung.

Health panel hrang hrangte'n vaccine dose thumna la tur hian mipuite ngen fo mah se, ram chhunga hri lengin ziaawm lam a pan zel tak avang leh, official record leh zin veivahna atan dose thumna lak tel kher a ngaih tel loh avangin precuationary dose lak hi mipuite'n an ngai pawimawh tawh lutuk lo nia ngaih a ni.

Hri leng hluar laia a tuar nasa state pahnih- Kerala leh Maharashtra state-te chu vaccine dose thumna la an chhiat zualna a ni. Kerala-ah hian booster dose la hi 11.03% leh, Maharashtra-ah 10.63% chauh an awm.

Precautionary dose lak chhiatna UT/state dangte chu - Delhi (19.22%), West Bengal (22.78%) leh Uttar Pradesh ( 25.57%) an ni a, hetih lai hian vaccine la an ṭhatna chu Ladakh(52.3%), Andhra Pradesh (41.13%), Pudducherry(39.73%) leh Sikkim (37.48%) te an ni.