Tamil Nadu sorkar fiah dawn rih lo

Madras High Court chuan Tamil Nadu Assembly SpeakerP Dhanapal-a’n rorellai, AIADMK MLA hel 18 a ban chungchang a ngaihtuah dawn avangin, Chief Minister Palaniswami kaihhruai sorkar chu House-ah fiah rih lo turin a ti.

Speaker Dhanapal-a chuan AIADMK hruaitu aṭanga ban, TTV Dhinakaran-a lamṭang MLA-te chuan sorkar an thlawpna an hnuhdawh thu an sawi hnuah, anti-defection law hnuaiah heng MLA helte hi a ban a ni. MLA ban te hian Madras High Court-ah petition an thehlut nghal a, Speaker thutlukna siam chu ngaihtuah nawn turin an ngen a ni.

Dhinarakan-a ukil, Dushyant Dave chuan Assembly Speaker hian dik lo takin anti-defection law hi a hmang niin a puh a, Speaker chu midang thu anga awmah a puh a ni. Dave chuan MLA-te hian party dodal zawngin vote an la thlak lo a, party aṭanga banna pawh an thehlut lo a, hei vang hian an lakah anti-defection law hmang ngawt theihna a awm lo a ni, a ti. Speaker chu MLA-te dikna chanvo rahbeh sakah a puh.

Eptu party lian ber, DMK chuan Speaker-in AIADMK MLA 18-te a ban dan chu democracy kalh niin an sawi a, Speaker Dhanapal leh Chief Minister Palaniswami-te chu bang turin an phut. DMK Working President MK Stalin chuan Assembly-a floor test neih an rawtna chu High Court pawhin a remtih sak thuai an beisei tih a sawi bawk.

Dhinakaran chuan AIADMK General Council-in amah leh a ni, VK Sasikala-i te party hruaitu aṭanga a ban hnuah, CM Palaniswami-a kaihhruai sorkar chu a la paihthla dawn tih a sawi a, a kaihhruaina hnuaiah AIADMK sorkar thar a ding dawn niin a sawi. CM Palaniswami kaihhruai sorkar lakah hel mah se, DMK chu thawhpui an tum lo tih a sawi nghal bawk.

AIADMK hotu leh Tamil Nadu chief minister hlui, J Jayalalithaa-i a thih hnuah a aiawha party hotu lu ber dinhmun chelh turin VK Sasikala-i chu thlan a ni. Chief Minister atana lakluh tuma buatsaih laiin a sum lakluh phu loa hausaa puhna thubuaiah thiam loh chantir niin Bengaluru jail-ah tantir a ni. Sasikala-i hian jail-a a tan hma lawkin a vahnu, Dhinakaran-a hi party deputy general secretary atan a ruat a ni. Mahse AIADMK hnuaia pawl pahnihte an inchhunfin hnuah, Sasikala-i leh Dhinakaran-te hi party hruaitu an nihna aṭangin ban an ni a, party-a genera secretary post pawh a titawp nghal a ni.