Dera hotuin jail chhungah nikhatah Rs 20 hlawh

Hindu sakhaw pawl pakhat, Dera Sacha Sauda hotu Gurmeet Ram Rahim Singh chuan pawngsual thubuai pahniha thiam loh chantir a nih avangin kum 20 tang tura hrem a ni a, Haryana-a Rohtak jail-ah tantir mek a ni.

DGP (Jails) KP Singh chuan Ram Rahim hian jail huan enkawlin thlai a ching a, ni khatah Rs 20 a hlawh ṭhin niin a sawi. Singh chuan Rs 20 chu Haryana jail-a unskilled job tana an nikhat hlawh zat bithliah a nih thu a sawi a, he hna chauh hi a thawh phalsak a ni rih tih a sawi bawk.

Ram Rahim hian a tanna barrack bula ramah chuan thlai te chingin, ni khatah darkar li aṭanga darkar nga vel a thawk ṭhin a ni. Hna dang thawh phalsak a nih loh bakah, television leh newspaper te pawh a hmuh phalsak a la ni lo bawk. Security lam thil avangin phone a hman pawh phalsak a ni lo bawk.