Rohingya Muslim-te thawn kir hi dan kalh a ni lo : Rajnath Singh

Union Home Minister Rajnath Singh chuan Rohingya Muslim-te chu India ramah dan loa rawn pem lut an nih avangin, an rawn kalna rama thawn kir leh chu dan kalh a ni lo, a ti.

Nimina National Human Rights Commission (NHRC)-in seminar a buatsaiha thu a sawinaah, minister chuan sorkar laipuiin Rohingya te thawnkir a tum chungchang chu a sawichhuak a, Rohingya raltlan te chu India rama humhimna zawnga rawn lut ni loin, dan loa rawn pem lut an ni, a ti. Myanmar sorkarin Rohingya te lo pawm leh a inpeih lai a, mi

ṭhenkhatin thawnkir an nih tur chungchang an lo sawisel chu a hriatthiam loh thu a sawi.

Home Minister chuan Rohingya-te chungchang chu UN Refugees Convention 1951-in a huam tel loh avangin thawnkir an nih pawhin India chuan international law a palzut dawn lo a ni, a ti. Sorkar laipuiin Myanmar rama Rohingya Muslim-te thawnkir a tum sawiseltute chuan Supreme Court-ah petition an thehlut a, court chuan a thil tih tum chhan sawifiah tur hian sorkar pawh a lo hriattir tawh a ni. Sorkar laipuiin court-a chhanna a pekah chuan, Rohingya zinga eng emaw zat chu Islamic State (IS) firfiak pawl leh Pakistan spy agency ISI nena inzawmna nei an nih thu a sawi a, heng mite hi India rama awmtir an nih chuan India ram himna pawh a derthawn phah thei a ni, a ti.

Sorkar laipui chuan Rohingya-te India rama awmtir phalsak an ni chuan, India khua leh tui dik takte chan tur ram leilung hausakna chu an lak hek sak nasa dawn a, hei hian hun kal zelah khawtlangah boruak ṭha lo leh, dan leh thupek lama buainate a thlen thei dawn niin a sawi.

Myanmar State Counsellor Aung San Suu Kyi-i chuan an ram aṭanga Rohingya Muslim tlanchhia, refugee an ni ngei tih finfiahte chu Myanmar ramah an kir an remti tih a lo sawi tawh a, heng mite venhimna leh chhawmdawlna hi pek an ni ang tiin a lo sawi tawh a ni.