Sonia Gandhi-i'n PM Modi hnenah ngenna thawn
Eptu pawl, Congress party president Sonia Gandhi chuan Prime Minister Narendra Modi-a hnenah ngenna thawnin, Parliament leh state legislature-a hmeichhe puala seat hmun thuma ṭhena hmun khat dahna tur bill chu pass a nih ngei theih nana hma la turin a ngen.
Kum 2010-a Congress party sorkar lai khan Parliament upper house, Rajya Sabha-ah Women's Reservation Bill hi pass a lo ni tawh a, mahse tun thlengin Lok Sabha-ah chuan chhan eng emaw vangin a la tlang thei lo a ni, tiin Sonia Gandhi chuan a sawi. He bill hi a tlang theihna turin Congress chuan a thlawp zel dawn tih a sawi bawk.
Lok Sabha-ah hian BJP leh a thawhpui party-te chuan majority neiin, he bill hi an ngai pawimawh tak tak a nih chuan awlsam taka pass theih nia sawi a ni.
Hetih lai hian hmeichhe politician-te chuan hmeichhe puala seat dah tumna hi mipa MP-te chuan an dodal niin an sawi. Parliament in hniha hmeichhe member awm zat hi 10% vel chauh a ni.
Women's right movement-te'n hun rei tak chhung hmeichhe puala seat hauhsakna tur hi tihpuitlin phutin nawrh, kawngzawh leh chaw nghei te an lo huaihawt tawh a, mahse mipa MP-te chuan bill hi an dang zel niin an sawi.