Fuel man sang duh loin AAP-in lungawi lohna lantir dawn

Delhi-a rorellai, Aam Aadmi Party (AAP) chuan ramchhunga fuel man sang zel duh lohna lantirin vawiin aṭang hian rampum huapin lungawi lohna an lantir dawn.

Party senior leader Gopal Rai chuan central-a BJP in sorkar a chan hnuah petrol aṭanga chhiah lak chu tisangin, kum 2014 aṭanga chhiah a tihsanna hi 150% a ni tawh a ni, a ti. Hei vang hia September 22-30 inkar hian rampum huapa lungawi lohna lantir an tum tih a sawi.

September 30, Dusshera ni hian Delhi-a ward 272-ah fuel man tihsanna rate chu an hal dawn tih a sawi bawk. Vawiin hian AAP MLA zawng zawng chuan an assembly constituency ṭheuhah lungawi lohna an lantir ang a, karleh Thawhlehni-ah union petroleum ministry kawtah an pungkhawm dawn bawk. Rai chuan Union Finance Minister Arun Jaitley-a'n sorkar laipuiin petrol leh diesel-a chhiah a lak zat tihhniam a tum loh thu leh, fuel man hi tihhniam an duh a nih chuan state sorkarin VAT an lakte chu an tihniam mai tur a ni, tia a sawi chu a dem thu a tarlang bawk. Delhi sorkar chuan petrol-ah chhiah a lak tlem thu leh, khawpui dangte ai pawha Delhi-a petrol man a tlawm zawk thu a sawi bawk.