India ramah Covid-19 kai pun belh zel
India ramah Covid-19 kai an pun belh zel a, union health ministry in a tarlan danin nimin thleng khan he hri kai hi ram pumah mi 49,391 an awm tawh a, mi 1,694 in an thihpui tawh bawk.
Thawhlehni khan hri kai hriat chhuah thar mi 2,958 an awm a, hemi ni vek hian he hri vang hian mi 126 an thi a ni.
Prime minister Narendra Modi chuan Thawhlehni khan special test force meeting a kaihruai a, vaccine siamna tura hma lak dan te, damdawi siam dan tur te, hri kaite enkawl leh test neih dante an sawiho a ni. Meeting zawh hnua sorkar laipuiin thuchhuah a siamah, vaccine 30 chuang siam mek a ni tih sawiin, ṭhenkhat chu trial stage pawh an thleng tawh niin a tarlang.
India rama hri kai zinga 14,183 chu enkawl dam an ni tawh a, nimin thleng khan recovery rate hi 28.71% a ni. Hetih lai hian mithiamte chuan India rama hri leng zual lai ber hun chu a la thleng lo niin an ngai.
India rama unemployment
rate 27.11%
Centre of Monitoring Indian Economy (CMIE) chuan India ramah hripui leng avangin hna nei lo an pung hle tih a sawi a, May thla tira unemployment rate chu 27.11% a tling tih a sawi. March thla laihawla unemployment rate aiin 7% in a sang tawh a ni.
CMIE chuan unemployment rate sanna hi urban area a ni tih sawiin, heng hi Covid-19 hluarna, red zone tamna a ni tih a sawi bawk. Urban area-a unemployment rate hi 29.22% a nih laiin, rural area-ah chuan 26.69% a ni thung.
PM Narendra Modi-an hri leng darh zel tur venna atana March 25 aṭanga ram puma kharkhipna, lockdown a puan khan ramchhunga unemployment rate hi a nghawng nasa dawn hle tih sawi lawk a lo ni tawh a ni.