PM Modi-a’n Mahamana Express vailiam

Prime Minister Narendra Modi chuan nimin khan Varanasi, Uttar Pradesh-a Mahamana Express thar a vailiam.

PM hi nimin khan a bial, Varanasi-ah hian ni hnih cham turin a kal a, Mahamana Express pathumna hi nimin tlai dar 3:30 khan a vailiam a ni. Mahamana Express rel pathumna hi Vadodara, Gujarat leh Varanasi, Uttar Pradesh inkara tlan tur a ni. Kartin Zirtawpni a piangin Varanasi aṭanga tlanchhuakin, Nilaini a piangin Vadodara aṭangin a tlanchhuak ve thung ang.

Vadodar leh Varanasi inkar hi km 1,531-a thui niin, rel tlanchak lam hi chawhrualin darkar khatah km 55.7 a ni dawn a, kawngah darkar 27 leh minute 30 hun a hmang ṭhin ang. Rel hi kawng lakah station hrang hrang - Gujarat-a Bharuch leh Surat, Maharashtra-a Amalner leh Bhusawal, Madhya Pradesh-a Itarsi, Jabalpur, Katni leh Satna bakah Uttar Pradesh-a Chheoki station-ahte a ding ṭhin dawn a ni.

Mahamana Express hi pindan 18 niin, AC 1st class pakhat, 2nd class pahnih, sleeper pariat, general pali, pantry car pakhat leh guard brake van pahnih a awm dawn a ni.

PM hian Varanasi-a a cham chhung hian project hrang hrang a hawng nghal dawn bawk a, heng zingah hian ‘Jal Ambulance’ (water ambulance) service, ‘Jal Shav Vahan’ (water-based vehicle for carrying bodies) service-te pawh a tel. Hei bakah hian handicrafts centre, Deendayal Hastakla Sankul pawh a hawng dawn bawk a ni.