Shiv Sena-te’n sa zawrhna dawr 500 chuang kharsak

Shiv Sena worker-te chuan Navratra festival neih dawn avangin Gurgaon-a sa zawrhna dawr 500 chuang chu an kharsak.

Shiv Sena Gurgaon wing general secretary leh party thupuangtu, Ritu Raj chuan sa zawrhna dawr hrang hrangte hi hrittirna an pek thu a sawi a, ni kua awh, Navratra festival chhunga an dawr khar tura hriattir an nih thu leh, thupek zawmlote chuan a nghawng an tawrh tur thu a sawi.

Sena worker-te hi Ningani khan Palam Vihar-ah pungkhawmin, sa zawrhna dawr hrang hrangte hi an kharsak a ni. Raj chuan Thawhlehni khan Gurgaon Deputy Commissioner Vinay Pratap Singh hnenah memorandum an lo thehlut tawh tih sawiin, mahse district thuneitute chuan sa zawrhna dawrte chu an khar tir loh avangin party worker-te chuan hma an la ta tih a sawi.

Police-te chuan Sena worker-te chetdan chu an ngaihtuah mek thu sawiin, mahni thuin tumahin dan an lekkawh thei lo tih an sawi. Dawrte hi tihhluihna hmanga Sena worker-te’n an kharsak a nih chuan an chungah action na takin an la dawn tih an sawi bawk.