Delhi-ah Rohingya-te thlawpna lantir

Delhi-a Jantar Mantar-ah Jamiat Ulama-e-Hind (JUH) Delhi division chuan sorkar laipuiin Rohingya Muslim-te thawn kir a tum chungchang duh lohna lantirin nawrh an huaihawt.

Ningani-a Rohingya-te thlawpna lantirnaah hian mi 5,000 vel an pungkhawm a, Prime Minister Narendra Modi-a kaihhruai sorkar an dem thute an aupui a ni.

Nawrh huaihawttute chuan raltlante thawnkir tumna chu an dem thu sawiin, sorkar laipui chuan thawnkir a tumna chhuan lamah Rohingya te chu firfiakte nena inzawmna neihah a puh niin an sawi. Rohingya Muslim leh firfiak pawlte inzawmna nei nia puh chungchangah sorkar chuan finfiahna a nei em tih an zawt a, an nei a nih chuan a nawlpuia tawrh tir lo a, thil dik lo titute chu hrem mai turin an phut a ni.

Hetih lai hian Union Home Minister Rajnath Singh chuan India rama Rohingya-te chu raltlan anga lut ni loin, dan loa rawn pem lutte an nih thu a sawi a, hei vang hian an ram lama thawn kir tum chungchangah dan bawhchhiahna a awm lo niin a lo sawi tawh a ni.

Jantar Mantar-a nawrh huaihawtte chuan Home minister thusawi hi sawiselin, Rohingya-te chungah tawrh­na nasa tak a thlen mek avangin sorkar chuan a policy chin baka a chet a ngaih hunte a awm a, ṭhenawm ramte pawh a biak pawh a ngai a ni, an ti. Nawrh huaihawtte hian UN Secretary General, Home Ministry leh Myanmar Embassy-ahte memorandum an thehlut nghal a ni.