Karnataka-in relief package Rs vbc 1,610 a siam
Karnataka sorkar chuan hripui leng vanga an state-a harsatna tawkte chhawmdawlna tur, cheng vaibelchhe 1,610 relief package a siam.
Chief minister BS Yediyurappa kaihhruai sorkar chuan relief package a siam hi sumdawng tenau, puantah tu, pangpar ching/zuar tu, mi thawmhnaw sua inhlawhfa (dhobi), lumettu, auto leh taxi driver te bakah harsatna tawk dangte chhawmdawlna tur a nih thu a sawi.
Pangpar chingtu/zuartu te chu an pangpar chinna, ram hectare khat zelah chhawmdawlna, Rs 25,000 pek an ni dawn a, dhobi leh lumettu te chu Rs 5,000, auto leh taxi driver-te Rs 5,000 pek an ni dawn a, construction worker-te chu a hmaa Rs 2,000 pek tawh bakah, Rs 3,000 pek belh leh an ni ang. Puan tahna hmuna thawkte Rs 2,000 ṭheuh an dawng dawn, sumdawng tenau Micro, small and medium enterprises (MSMEs) te chuan thla hnih chhung electric bill ngaihdam an ni dawn bawk.
Chief minister Yediyurappa chuan Covid-19 leng chuan loneitute chauh ni loin service professional te tan pawh harsatna nasa tak a thlen a ni, a ti. Hei vang hian a kaihhruai sorkar chuan hnathawktu hrang hrangte chhawmdawlna tur hi a siam ta tih a sawi. Karnataka-ah hian dhobi 60,000 leh lumettu 2,30,000 vel zet an awm a ni.