Rahul Gandhi-in petrol- Diesel man tihsan sawisel
Congress hruaitu Rahul Gandhi chuan sorkarin petrol leh diesel man a tihsan chu sawiselin 'fair' lo a tih thu a sawi.
Rahul Gandhi chuan nimin khan Covid-19 vanga mi zawng zawngin economy-a harsatna an tawh laia sorkarin tuialhthei man tihniam loa a tito zawk chu a dem tih a sawi a, tihniam leh turin a phut.
"Coronovirus vangin kan unaupa leh unaunu vaibelchhe telin economic lamah harsatna an tawk. Hetiang hunah hian tuialhthei man tihhniam aiin sorkar chuan litre khatah Rs 10-13-in a tito zawk a, hei hi a fair lo hle a, an sut leh tur a ni," tiin a tweet.
Delhi-ah chuan petrol hi litre khatah Rs 71.26 a ni tawh a, diesel man pawh litre khatah Rs 62.29 aṭangin Rs 69.39-ah tihto a ni bawk.
Ramchhung hmun hrang hrangah tuialhthei man hi a to chho zel a, Uttar Pradesh-ah pawh nimin khan petrol litre khata Rs 2-a tihto ni tawhin, diesel pawh Re 1-a tihto a ni. Delhi-ah chuan Thawhlehni aṭang khan tihto a ni thung.