Sushma Swaraj-i thusawi Pakistan-in chhang

External Affairs Minister, Sushma Swaraj-i chuan UN General Assembly-a thu a sawiah, Pakistan chu India laka indo kalpui leh, firfiak leh buaina siamtute chherchhuaktuah a puh a, hei hi Pakistan chuan a chhang let a ni.

Sushma Swaraj-i chuan, “Keinin scientist, scholar, doctor leh engineer-te kan chher­chhuah laiin, nangnin enge in chherchhuah ve? Nangni chuan firfiak in chherchhuak a, firfiak camp in siam a, firfiak pawl Lashkar-e-Taiba, Jaish-e-Mohammed, Hizbul Mujahideen leh Haqqani-te in siam zawk a ni”, tiin Pakistan chungchang a sawi. Pakistan chuan firfiakte tana a sum sen ṭhin hi an ram hmasawnna turin hmang zawk ni se chuan, Pakistan leh khawvel ram dangte chu hmun him leh nuam zawkah a chang tawh ang, a tibawk.

Pakistan chuan Swaraj-i thusawi hi chhangin, inbiakna nei tura a inhawn reng thu leh, firfiak nia sawite chu eng chin nge tih sawi chiang turin UN a ngen bawk. UN-a Pakistan Permanent Representative Maleeha Lodhii chuan, Swaraj-i chu political party pakhat, Mahatma Gandhi thattu nia puha tel a ni tih a sawi a, Jammu and Kashmir-a India sipaite dah an ni pawh dan kalh a nih thu a sawi.

Lodhi chuan, “Jammu and Kashmir hi India ram a ni lo a, hei vang hian India-in a sipaite a dah hi dan kalh a ni”, a ti. India chu Pakistan ram chhunga firfiaka chetna thlen tirah a puh bawk a, hemi atan hian India chuan enthlatu Kulbhushan Jadhav pawh Pakistan-ah a tir a ni, a ti. Jadhav hi Indian Navy officer hlui a ni a, Pakistan military court chuan enthlatu nia puhin, thi turin a chung­thu a lo relsak tawh a ni. Mahse India chuan he puhna hi thu dik lo a ni tiin, International Court of Justice-ah a zualko a ni.