Rohingya chhawmdawlna tur ton 1,000 thawn

India chuan Bangladesh rama Rohingya raltlan awmte chhawmdawlna tur thil chi hrang hrang, ton 1,000 a thawn. Heng chhawmdawlna thawn hi raltlan chhungkaw 62,000 velin an chhawr thei dawn a ni.

Raltlante chhawmdawlna tur hi Indian Naval Ship Gharial hmangin thawn a ni a, hei hi Myanmar aṭanga tlanchhia, Rohingya Muslim-te awmna, Bangladesh-a Chittagong-ah thawn a ni ang. Chhawmdawlna thawn zingah hian ei tur bakah, thawmhnaw leh thosi lente a tel a ni. Hemi hma hian Indian Air Force C-17 transport aircraft hmangin chhawmdawlna hi thawn a lo ni tawh bawk. UN chuan Bangladesh-a hian Rohingya raltlan 430,000 vel an awm mek niin a sawi.

Hetih lai hian sorkar laipui chuan India rama Rohingya lutte chu an rama thawnkir dan a ngaihtuah mek. Ram hrang hrangten he thil hi an sawisel a, mahse Union Home Minister Rajnath Singh chuan India rama Rohingya lutte chu raltlan ni loin, dan loa pem lut an ni tih a sawi a, heng mite thawnkir tum chu dan kalh a ni lo tih a sawi bawk.

India ramah hian Rohingya 40,000 vel an awm mek a, mahse heng zinga hian raltlan anga inhumhimna dila lut an awm lo niin minister chuan a sawi a, dan loa India rama awm vek an ni, a ti. Hei bakah hian Rohingya zingah hian Pakistan firfiak pawl nena inzawmna neite an awm a, hei hi India ram himna a tiderthawng thei tih a sawi bawk a ni.