Banaras Hindu University zirlai 1,200 lakah FIR thehlut

Uttar Pradesh-a Banaras Hindu University (BHU)-a zirlaiten nawrh an huaihawtnaah tharum thawhna a thleng a, zirlai 1,200 lakah FIR thehluh a ni.

University-a Arts zirlai hmei­chhe pakhat chu hostel lama a kir tur mawi lo taka auh nawmnah a ni a, hei hi duh loin zirlaiten nawrh an huaihawt ta a ni. Campus chhunga zirlai nawrh huaihawt te chu police-te chuan hnawhdarh an tum a, an innawr buai zui ta a ni.

University thuneitute chuan campus chhunga buaina chhuakah hian pawn lam mite an inrawlh niin an sawi a, Police Commissioner chuan he thil thleng hi chhui chian a nih tur thu a sawi. Buaina chhuak avang hian police tam tham tak chu campus-ah hian duty tir an ni bawk.

BHU thuneitute chuan campus-a buaina chhuak avang hian Dusshera holiday neih tur pawh a hun hma ni thum aṭanga neih ṭan a rel a, October 2 thleng chawlh a puang nghal a ni.

Uttar Pradesh Chief Minister Yogi Adiyanath-a chuan Divisional Commissioner hnenah BHU zirlai, a bikin hmeichhiate chunga police-te chet dan te, kut an thlak dante report kimchang pe turin a ti.

Buaina hi kar kalta Ni­ngani zana zirlai hmeichhe pakhat, hostel lama a kir tur mi ṭhenkhaten an lo auh nawmnah avanga zirlai lungawi loten Vice Chancellor hmuh an tum laiin a chhuak a ni. Zirlai lungawi lote chuan zirlai hmeichhia lo au nawmnahtute chu hrem ngei an phut thu an sawi. Au nawmnah tawktu, zirlai hmeichhia hian mipa pathum, bike-a chuangten mawi lo taka au a, khawih an tum laiin a tlanchhia a, he thil thlen lai hian a awmna aṭanga meter 100 vel leka hlaah varsity security guard-te pawh an awm a, mahse an rawn inrawlh duh lo niin a sawi. Warden hnenah a chunga thil thleng a hrilh pawhin, a thlavang hauhsak aiin engvanga tlai taka haw nge a nih tih a lo zawt let zawk niin a sawi.

Warden-in zirlai thlavang hauh lo a, a lo hauh zawk avang hian zirlai dangte an lungawi lo hle a, Ningani zanlai khan main gate bulah lungawi lohna lantirin an ṭhukhawm nghal a ni.

BHU zirlaite chuan campus chhungah auh nawmnah an tawk fo a, mahse misualte chungah hian varsity thuneitute chuan eng action mah an la ngai lo niin an sawi a ni.

Police leh BHU professor-te chuan zirlaite hi an nawrh titawp turin an ti a, mahse zirlaite hian titawp duh loin university vice-chancellor hmuh ngei an tum a ni. Inrinni zan khan police-te chuan zirlai pungkhawmte hi hnawhdarh an tum a, an innawr buai zui ta a ni.

Campus-a zirlai leh police-te innawr buainaah zirlaite kut thlak an nih avangin UP sorkar chuan nimin khan additional city magistrate pathum leh police pahnih a sawn nghal. Zirlaite chuan campus security leh police-te tianga vuain, an samah te an hnuk niin an sawi.