Trinamool Congress hruaitu Mukul Roy a bang

West Bengal-a rorellai, Trinamool Congress senior leader leh Rajya Sabha member, Mukul Roy chuan nimin khan party aṭanga a ban thu a puang.

TMC all-India general secretary hlui, Chief Minister Mamata Banerjee-i thachhang dawltu bera ngaih, Roy hian Trinamool Congress working committee aṭanga a ban thu hi sawiin, September 30-a Durga puja a zawh hunah Rajya Sabha member a nihna leh, party primary member a nihna aṭangin a bang dawn tih a sawi.

Kum 63 mi, Roy chuan kum 1997, December 17-a Trinamool Congress party an lo din chu rilru na taka a chhuahsan a ngaih thu a puang. Roy chuan party aṭanga a ban chhan leh, eng party nge a zawm dawn tih chu Puja zawh hnuah a puang dawn tih a sawi bawk.

Kum 2015-a Saradha chit fund case-a Roy-a hming a lan hnuah party general secretary aṭangin ban nghal a ni a, CM Banerjee-i nen pawh an inkar boruak a chhe chho hle nia sawi a ni. A fapa, Subhrangshu pawh TMC MLA nilai a ni a, party aṭangin a bang ve dawn em tih erawh sawichian a la ni lo.

Mukul Roy-a’n ban a tum thu a sawi hnuah, TMC chuan kum ruk chhung atan an party aṭanga hnawhchhuah a nih thu an puang ve nghal. TMC chuan Roy hian an party elpui party dangte chu inzawmna a neihpui avanga hnawtchhuak an nih thu an sawi.