SM Krisha makpa in dapnaah Rs vbch 650 hmu

Income Tax Department-in union minister hlui, SM Krishna makpa, VG Siddhartha chenna-in an dapnaah cheng vaibelchhe 650 an hmu.

Kar kalta Ningani aṭang khan IT official-te hian VG Siddhartha hmun 25, Bengaluru, Hassan, Chikmagalur, Chennai leh Mumbai amite an dap a ni. Siddhartha hi coffee entrepreneur a ni a, cafe chain lar tak, Cafe Coffe Day neitu zinga mi niin, Bengaluru-ah an headquarters a awm a ni.

IT department chuan thu­chhuah siamin, an hmun dapte hi coffee, tourism, information technology kaihhnawihte a nih thu an sawi a, heng hmunah hian an sum lakluh an puanzar loh hmuhchhuah tam tak an nei tih a tarlang.

SM Krishna hi hun rei tak Congress party-a a awm hnuin tunhnaiah BJP a zawm a, Karnataka chief minister bakah, central-ah external affairs minister te a lo ni tawh a ni. Maharashtra Governor pawh a lo ni tawh bawk.