Sorkar laipuiin kum 5 chhung atan PIF dan pawnah a hnawl

Sorkar laipui chuan Islamic organisation, Popular Front of India (PFI) leh a hnuaia pawl hrang hrangte chu firfiak zawnga chetnaa an inhnamhnawih avangin kum nga chhung atan dan pawnah hnawl a ni tih a puang.

Tun hnaiah central agency, National Investigation Agency (NIA) chuan state hrang hranga PFI office-te dapin, an member 240 chuang a lo man tawh bawk a ni.

Thawhlehni zan khan sorkar laipui chuan Unlawful Activities (Prevention) Act (UAPA) hnuaiah PFI leh a hnuaia pawlte chu dan pawnah hnawl an ni tih a puang. Students Islamic Movement of India (SIMI), Jamat-ul-Mujahideen Bangladesh (JMB) leh Islamic State or ISIS nena inzawmna neiin, ram chhunga pawikhawihna leh firfiakte chetna hrang hrangah an inrawlh niin a sawi.

Union Home Ministry-in thupek a tihchhuahah, PFI hian ramchhung leh ram pawn aṭangtein fund an dawng a, ram pawn lamahte thlawptu ṭha tak neiin, hengte hi India ram security atan a hlauhthawnawm a ni, a ti. Kerala-a college professor pakhat kut tansaknaah te, sakhaw dang pawl mi leh sate thahnaahte PFI hi an inhnamhnawih tih a sawi bawk.

Ministry chuan state pathum - Karnataka, Gujarat leh Uttar Pradesh chuan PFI dan pawna hnawl tura rawtna hi an thlen tih sawiin, central agency-ten an pawl chanchin hrang hrang an chhui leh, finfiahnate an lakkhawm aṭangin sorkar chuan thutlukna hi a siam tih junior home minister Ajay Mishsra Tenj chuan a sawi bawk.

PFI bakah inzawmna a neihpui pawl dan pawna hnawl dangte chu - Rehab India Foundation (RIF), Campus Front of India (CF), All India Imams Council (AIIC), National Confederation of Human Rights Organisation (NCHRO), National Women's Front, Junior Front, Empower India Foundation and Rehab Foundation, Kerala-te an ni.

PFI dan pawna hnawlna thupek tihchhuah anih rual hian, social media company hrang hrangte chuan PFI kaihhnawih thil awmna, Facebook leh Twitter bakah, social media account dangte pawh titawp nghal vek tura hrilh an ni bawk.

Kerala-a eptuten RSS dan pawna hnawl ve phut
Sorkar laipuiin PFI dan pawna a hnawl chu lawmawm an tih thu an sawi rualin, Kerala-a eptu pawl, Congress leh a thawhpui Indian Union Mulsim League (IUML) chuan RSS pawh dan pawna hnawl ve turin sorkar an phut.

IUML hruaitu MK Muneer chuan PFI chetdan a dem thu sawiin, he pawl hian Quran chu dik lo taka kalpuiin an pawl mite chu tharum thawhna kawng lam an zirtir a ni, a ti. PFI chuan ṭhalaite rilru a hruaikawi bakah, khawthlanga inṭhendarhna leh inhuatna thlen an tum bawk a ni, tiin a sawi. Sakhua leh pawl labing zawnga thiltih chu Islamic scholar-te chuan an dem vek thu leh, RSS chetdan pawh chu an dem hle tih a sawi bawk.

Senior Congress leader leh state home minister Ramesh Chennithala pawhin PFI dan pawna hnawl chu thil ṭha tak a nih tih a sawi a, "RSS pawh hetiang bawk hian dan pawnah hnawl an ni ve tur a ni. Pawl pahnihte hian sakhaw lama inhuatna thlenin, khawtlanga inṭhendarhna an siam a ni," a ti.