PM-in a thlawna electric êng pekna tur scheme tlangzarh

Prime Minister Narendra Modi chuan ramchhunga mi rethei zawng zawngte hnena a thlawna electric eng pekna tur, ‘Saubhagya’ scheme a tlangzarh. Hemi atan hian cheng vaibelchhe 16,320 ruahman a ni.

‘Saubhagya’ hi Pradhan Mantir Sahaj Bilji Har Ghar Yojana hnuaiah siam niin, Hindutva icon Deendayal Upadhyaya pianchamah hawn a ni. He scheme hnuaiah hian kum 2019 inthlanpui neih hmain ram chhunga mirethei chhungkua, vaibelchhe li vel hnenah power connection pek vek tum a ni. Ram pumah he scheme kalpuina turah hian Rural Electrification Corporation Limited (REC) chu nodal agency a ni ang.

Scheme thar hawn a nih thu a sawinaah, PM chuan ramchhunga electric eng la nei lo chhungkuate ngaihsak an nih tur thu sawiin, sorkar chuan an inah ngei power connection hi a thlawnin a pe dawn a ni, a ti. Mi retheite dinhmun chawikanna tur scheme thar siamna atan hian sorkar chuan cheng vaibelchhe 16,000 chuang zet a hmang dawn tih a sawi bawk.

PM chuan India-in zalenna a hmuh aṭanga kum 70 hnuah, chhungkaw vaibelchhe 25 zing a, vaibelchhe 4 velin power connection an la nei lo chu pawi a tih thu a sawi.

Official-te sawidanin, he project atana Gross Budgetary Support chu Rs vbch 12,320 a ni a, rural area atan Rs vbch 14,025 leh urban area atan Rs vbch 2,295 ruahman a ni. He scheme hnuaiah a thlawna electricity connection dawng thei turte chu Socio Economic and Caste Census (SECC) 2011 data behchhanin thlan an ni ang.