Afghan-ah sipai tir dawn lo : Defence Minister
Defence Minister Nirmala Sitharaman-i chuan India tlawha rawn zin, US Defence Secretary James Mattis nen an inkawmnaah, Afghanistan ramah India sipaite tirh an ni dawn lo tih a hrilh.
Sitharaman-i chuan Afghanistan ram dinhmun siamṭhatna turin India chuan theihtawpin a pui a, dan siamna te, school leh medical lama a puih bakah training te pawh a pe ṭhin tih a sawi a, hei hi thawh chhunzawm zel an tum rualin, khawmual sipaite tirh luh tumna a awm lo tih a sawi.
India leh US chu khawvela democracy ram lian pahnih an ni thu sawiin, inzawmna leh thawhdunna nghet tak leh duhdan thuhmun an neih thu a sawi.
James Mattis pawhin Afghanistan tana India inpekna leh tha thawhte chu US chuan a ngaihlu hle tih a sawi a, he rama democracy tungding tur leh mipuite himna kalpuina tura hmalaknate chu a thlawp reng tih a sawi bawk.
Mattis hi US President Donald Trump-a cabinet zingah India ram rawn tlawh hmasa ber a ni a, nimin khan Prime Minister Narendra Modi hmuin, India-US inlaichinna chungchangte an sawidun a ni.