Honeypreet-i’n anticipatory bail dil

Hindu pawl, Dera Sacha Sauda hotu, Gurmeet Ram Rahim-a’n a fa atana a lak, Honeypreet-i chuan Delhi High Court-ah anticipatory bail a dil.

Gurmeet Ram Rahim-a hi amah zuitu zinga hmeichhe pahnih pawngsuala puh niin, thiam loh chantir a ni. Kum 20 tang tura hrem a ni a, Haryana-a Rohtak jail-ah a tang mek a ni. Thiam loh chantir a nih hnu hian Honeypreet-i hi a bibo zui ve nghal a, Nepal ramah a tlanchhia nia sawi a nih hnuah Delhi-ah a awm tih hriat a ni.

Thawhṭanni khan Honeypreet-i chuan anticipatory bail dilna hi court-ah a thehlut a, hminghliauna nei lo leh dan ang thlapa thil ti ṭhin a nih thu sawiin, Dera hotu chungchang chhuinaah pawh thuneitute chu thawhpui a inpeih thu a sawi a ni.

August 25 aṭanga chin hriat loha a bikbo hnu kha, Honeypreet-i man tum hian Haryana police-te chu ramchhung hmun hrang hrangah an kal a, Indo-Nepal border pawh an tlawh a ni. Nimin zing khan Delhi leh NCR-a hmun hrang hrang an dap bawk. Haryana Police-te chuan Ram Rahim-a thiam loh chantir a nih hnuah tharum thawhna nasa tak thlenga inhnamhnawiha puh, mi 43 wanted list an tihchhuahah Honeypreet-i hi a tel a ni. Thawhṭanni khan Haryana-a Panch­kula court chuan Honeypreet-i leh midang pahnih manna tur thupek hi a lo tichhuak tawh a ni.