Gorkha-te’n nawrh an titawp

West Bengal aṭanga Gorkhaland state hran siam phuta Darjeeling hill area-a nawrh huaihawttu, Gorkha Janmukti Morch (GJM) chuan ni 104 zet nawrh an huaihawt hnuah nimin aṭang khan tiam chin awm loin an titawp.

GJM-te’n nawr an huaihawt chhung hian tharum thawhna a chhuak nasa hle a, mi 11-in nunna an chan a, sorkar building leh hmun pawimawh dangte pawh tihchhiat a ni.

Thawhlehni zan khan Union Home Mi­nister Rajnath Singh chuan GJM hotu Bimal Gurung chu biain, nawrh tihtawp a, hill area-a nunphung pangngai a awm leh theihna tura thuneitute hmalakna thlawp turin a ngen a ni. Home Minister-in a ngen hnu hian, GjM vice president Kalyan Dewan chuan nawrh tihtawp a nih thu hi a puang a ni.

GJM-in nawrh an huaihawt ṭanna chhan hi West Bengal sorkarin hill station-a school zawng zawnga Bengali ṭawng zir luihtir a tum vang a ni a, hei hi duh loin lungawi lohna an lantir a, a hnuah state hran pek an phut zui a ni. Nawrh huaihawtnaa tharum thawhnate a thlen avang hian, West Bengal sorkar chuan GJM hotu Bimal Gurung-a chu thubuai eng emaw zat a siamsak a, hei vang hian Gurung hi Darjeeling aṭangin a tlan­chhia a, Sikkim-ah a biru nia tarlan a ni. Union Home Minister Rajnath Singh chuan GJM thil phut hrang hrang chungchang sawiho tura official-level meeting ko turin Union Home Secretawry Rajiv Gauba pawh hriattir a nih thu a sawi bawk.