BHU chief proctor a bang

Uttar Pradesh-a Banaras Hindu University (BHU) campus chhunga zirlaiten nawrh an huaihawtnaa buaina chhuak chungchangah, chief proctor Prof. ON Singh chuan mawhphurhna lain banna a thehlut. Prof. ON Singh hian vice-chancellor Girish Chandra Tripathi hnenah Thawhlehni zan khan banna lehkha a thehlut a ni.

BHU campus chhungah hian zirlai hmeichhe pakhat chu auh nawmnah leh khawih tum a nih avangin zirlaite chuan lungawi lohna an lantir a, police-te nen an innawr buai zui a ni. Police leh zirlaite innawr buai avang hian zirlai eng emaw zatin hliam an tuar a, zirlai 1,200 lakah FIR ziahluh a ni bawk. National Human Rights Commission chuan Uttar Pradesh chief secretary, DGP leh BHU vice-chancellor hnenah campus chhunga buaina chhuah dan report kimchang hi thehlut turin a lo hriattir tawh a ni.

State sorkarin campus chhunga buaina thleng chungchang report a siamah univeristy thuneitute chu hma la ṭha tawk loah puh an ni. Buaina chhuak chungchang chhuitu officer chuan uniersity thuneitute hian auh nawmnah leh khawih tawktu, zirlai hmeichhe complaint hi univerity thuneitute chuan an ngaipawimawh tawk lo a, hei vang zirlai rualten nawrh an huaihawt a ngaih phah ta a ni, a ti. Vice chancellor chenna kawta zirlai pungkhawmte hi police-te chuan hnawtdarh an tum a, an innawr buainaah zirlai hmeichhe tam takin kut an tuar nia sawi a awm bawk. He thil thleng vang hian Prime Minister Narendra Modi leh BJP president Amit Shah-te chuan UP CM Yogi Adityanath pawh an be tawh a ni.