Congress President thlan turah Digvijaya Singh-a'n chuh tum ve leh

Congress party president thlanna neih turah party senior leader, Madhya Pradesh chief minister hlui Digvijaya Singh chuan chuh a tum tih a puang ve leh.

Kum 20 chuang hnua a ṭum khatna atan October 17 hian party president thar tur hi an thlang ang.

Party hruaitu lu ber thlan turah hian union minister hlui, Shashi Tharoor chuan a chuh tur thu a puang tawh a, hetih lai hian inthlan chuh tumtu, Rajasthan chief minister Ashok Gehlot erawh CM a nihna aṭanga banna a la thehluh loh avangin a dinhmun hi a la chiang lo. Rahul Gandhi chuan party hruaitu hi 'one man one post' tura a duh thu leh, chanvo pawimawh dang chelh lo a, party hruai hna enkawlna atana insawrbing tura a duh thu sawiin, Gehlot pawh hi party president atana thlan a nih chuan CM a nihna aṭanga ban a duh thu a lo sawi tawh a ni.

Kum 75 mi, Digvijaya Singh chuan inthlan a chuh tur thu hi nimin khan tichiangin, Congress office aṭangin form 10 a lachhuak a, vawiinah paper-te hi thehluh a tum. Shashi Tharoor pawhin vawiinah nomination paper thehluh a tum tih a sawi bawk. Vawiin hi inthlan chuh tumte tana nomination thehluh theih hun tawp a ni.

Rajasthan CM Gehlot hi Gandhi chhungkua pawhin an thlawp niin, party president thlanna neih turah pawh tling tura rinkai a ni hman a ni. Mahse CM aṭanga banna thehluh tura beisei a nih chungchangah Rajasthan-a an party unit chhungah buaina awmin, amah thlawptu MLA ṭhenkhat an hel nia sawi a ni. Hei vang hian party hruaitu thlanna neih tura hian a chuh dawn em tih a chiang ta lo a ni. Nimin tlai khan Delhi-ah Congress interim president Sonia Gandhi nen an inhmu a, an buaina chungchangte an sawidun rin a ni. Nimin vek khan Rajasthan deputy chief minister hlui Sachin Pilot pawhin Sonia Gandhi hi a hmu ve bawk.