RJD President atan Lalu Prasad Yadav thlang

Bihar chief minister hlui leh Rashtriya Janata Dal (RJD) founder Lalu Prasad Yadav chu Nilaini khan RJD national president atan chuhtu dang awm loin tlinga puan a ni a, party president term 12-na a chelhna tur a ni.

Lalu Yadav hian Nilaini khan party president chuh tum hian nomination paper a thehlut a, thehlut dang an awm loh avangin RJD election-a returning officer, Uday Naryan Chodhary chuan a nomination paper-te a enfiah hnuah tlingah a puang.

Party president atan tling leh nghal mah se, official chuan October 10-a Talkatora Stadium, New Delhi-a convention neih hunah puan a ni dawn a, certificate pawh hlan a ni ang.

Yadav hian kum 1997, July 5 khan Janata Dal a chhuahsan hnuah Rashtriya Janata Dal hi a din a, party president a ni nghal a ni, he post hi a la chelh chhunzawm reng a ni. Kum 25 chhungin party hotu lu ber atan hian ṭum 12, chuhtu awm loin a tling tawh a ni.