Vawiinah 'Bharat Jodo Yatra' Karnataka Leg ṭan dawn

Congress party-in an party hruaitu, Rahul Gandhi hoa 'Bharat Jodo Yatra' an neih chu Kerala an kalchhuah hnuah, vawiin aṭangin Karnataka aṭangin an ṭan ve leh dawn.

Karnataka state-ah hian km 511 vela thui an kal dawn a, ni 21 hun an hmang dawn a ni.

Karnataka Congress president DK Shivakumar chuan party president Sonia Gandhi leh Priyanka Gandhi Vadra-te pawh an state-a yatra neih chhung hian an tel ve dawn tih a sawi a, an tel ni tur erawh a la puang lo.

Shivakumar chuan zing dar 9-ah Yatra Kerala leg hi Gundlupet aṭangin ṭan ani dawn tih a sawi a, an state-a a awm chhung hian holiday ni hnih an nei dawn a, Ballari-ah public meeting neih a ni dawn bawk tih a sawi. Mahatma Gandhi piancham, October 2 hian Nanjangud Taluk-a Badanavalu-ah programme an nei ang.

Yatra neih pah hian Rahul Gandhi chuan civil society, hmeichhia, zirlai, tribal leh loneitu aiawhte a kawm ṭhin dawn a, hemi buaipuitu tur team pawh siam a nih thu a sawi.

Karnataka-a yatra an neihah hian Chamarajanagar, Mysuru, Mandya, Tumakuru, Chitradurga, Ballari leh Raichur district-te an kal tlang dawn a, Raichur aṭangin Telangana state an lut dawn a ni. An state an chhuahsan hmain, October 19 hian rally pui tham tak Ballari-ah neih tum a ni.