J&K-a bus 2-ah bomb tipuak

Jammu and Kashmir-a Udhampur district-a bus pahnihah bomb tihpuah a ni a, mi pahnih an hliam.

Police official chuan Nilaini zan dar 10.30 khan Domail Chowk-a Petrol Pump bulah bus ding laiah bomb hi tihpuah a ni tih sawiin, a hnu darkar riat, nimin zing dar 6 vel khan Old Bus Stand-a bus dinglai pakhatah bomb hi tihpuah a ni leh bawk.

Bomb puak hmasa zawkah hian mi pahnihin hliam an tuar a, mahse ngaihtuahawm an ni lo. A hnuhnung zawkah erawh hliam an awm lo a, mahse bus hi a chhe hneh hle niin official-te chuan an sawi. Police-te chuan pawikhawihna thleng chungchang hi an chhui mek.

Kumin March 9 khan Udhampur district-a Slathia Chowk-ah IED tihpuah a lo ni tawh a, mi pakhat thiin mi 14 an hliam a ni.