Sorkar laipui-in Internal Security Scheme a pawm

Sorkar laipui chuan cheng vaibelchhe 25,000 senna tur, internal security scheme a pawm. He scheme hi police force tuaitharna leh firfiakte beih letna changtlung zawk kalpuina tur atana duan a ni.

Prime Minister Narendra Modi-a kaihhruai Cabinet Committee on Security (CCS) chuan kum 2017-18 leh 2019-20 atana police force tihchangtlunna tur, Modernisation of Police Force (MPF) chu a pawm a ni.

Home Minister Rajnath Singh chuan he scheme hi ramchhunga internal security scheme siam tawh zinga lian ber a nih thu a sawi. Kum thum chhung atan he scheme kalpuina tur hian cheng vaibelchhe 25,060 ruahman a ni a, heng zinga vaibelchhe 18,636 chu sorkar laipuiin a tum ang a, state-in an tum tur chu vaibelchhe 6.424 a ni.

Rajnath Singh chuan he scheme hnuaiah hian Jammu and Kashmir, hmarchhak state leh Maoist hel hluarna state-a security tihchakna atan cheng vaibelchhe 10,132 ruahman a nih thu a sawi. Andhra Pradesh-a Amravati-ah forensic science laboratory siam a ni ang a, Jaipur-a Sardar Patel Global Centre for Security leh Counter-Terrorism leh Anti-Insurgency bakah, Gandhinagar-a Gujarat Forensic Science University pawh tihchangtlun a ni bawk ang.

Minister chuan he schem hian PM sorkarin India ram him leh nuam siam tuma a duhthusam tihpuitlinna kawngah a pui dawn tih a sawi bawk.