Jaya-i thih dan chhui hna thla 3 chhunga zo turin ti

Tamil Nadu sorkar chuan chief minister hlui, J Jayalalithaa-i thih dan chhui turin inquiry commission din a nih thu leh, commission hian Thawhṭanni aṭanga thawk ṭanin thla thum chhunga an thil chhui hna zo tura tih a nih thu a sawi.

Commission hian hospital-a Jaya-i dahluh a nih aṭanga a thih ni thlenga thil thlen dan kimchang a chhui dawn a ni. Jaya-i hi kum 2016, September 22 khan damdawi-inah dah luh a ni a, 2016 December 5 khan a thi a ni. Damdawi-ina enkawl a nih chhung hian a dinhmun puanzar ṭhat a nih loh bakah amah hmuh tuma kal tam tak chu an hmuh phalsak a ni lo a, hei vang hian a thih danah thil dik tawk lo a awm nia ngaitu mi tam tak an awm a ni. A thih danah hian tuna jail-a tang mek, VK Sasikala-i chu a inrawlh ringtu an awm a ni.

Tamil Nadu Chief Minister K Palaniswami chuan High Court judge hlui kaihhruaina hnuaiah inquiry commission hi din a nih thu puang ta a ni.