Dera hmun enfiah turin thupek tichhuak
Punjab and Haryana High Court chuan Hindu sakhaw pawl pakhat, Dera Sacha Sauda hnuaia zirna-in hrang hrangte enfiah turin thupek a tichhuak.
High Court chuan Chandigarh court commissioner Anil Kumar Singh Panwar hnenah hriattirna hi pein, Dera hnuaia zirna inte enfiah a, report thehlut turin a ti. Hriattirna pekah hian heng hmun din a nih hun leh sum an lakluh dan te, zirna enkawl a nih dante report turin a ti a ni.
Dera hotu, Gurmeet Ram Rahim Singh chu amah zuitu zinga mi hmeichhe pahnih pawngsuala chungchangah thiam loh chantir a ni, kum 20 tang tura hrem a ni a, Haryana-ah Rohtak jail-ah tantir mek a ni. Dera hotu man a nih hnu hian an pawl hmun hrang hrangte chu enfiah zui a ni a, Dera nena inzawmna nei institute pakua pawh an account khawih chet theih loha hrek sak nghal an ni. Hemi hnu hian zirna in hrang hrangte chuan account hreksak hi hlip turin court-ah ngenna an thlen a ni.
Dera hnuaiah hian educational institution pakua leh medical institution pakhat a awm a, hengah hian zirlai 7,000 vel awmin staff member 1,000 an awm a, hospital-ah damlo tam tak enkawl mek an ni bawk. Court thupek anga institute-te account hreksak a nih vang hian thawktute hlawh pawh pek theih a ni lo a, bill hrang hrang pawh an pe thei lo nia sawiin, an account hi hman phalsak turin an ngen a ni.