Nikhata hri kai hmuh chhuah thar tam ber ni leh Nikhata dama puan tam ber ni a thleng

Ministry of Health and Family Welfare chuan nimina report a tihchhuahah hri kai hmuh chhuah thar 49,310 an awm a, ni khata hri kai hmuh chhuah thar tam ber ni a thleng leh. Hetih lai hian hri kai tawh dama puan 34,602 lai an awm bawk a, hei pawh hi ni khata hri kai dama puan tam ber a ni bawk.

India ram hmun hrang hrangah hri kai mi 12,87,945 zet an awm tawh a, heng zinga 4,40,135 chu enkawl dam an ni tawh laiin 8,17,209 chu an dam tawh thung. Enkawl dam tawh rate hi 63.45% a tling tawh. Darkar 24 chhungin ramchhung hmun hrang hrangah hripui vangin mi 740 an thi leh a, nimin thleng khan mi 30,601 lai thi tawhin, thihpui rate hi 2.3% a ni.

Indian Council of Medical Research (ICMR) chuan nimina report an tihchhuahah darkar 24 chhungin sample 3,52,801 an test a, hri len ṭan­tirh aṭanga nimin thleng khan sample 1,54,28,170 an test tawh. ICMR hian Covid-19 test-na atana laboratory pawmpui 1,290 a nei tawh a, heng zinga 897 hi sorkar laboratory a ni a, 393 chu private laboratory a ni thung. Hri leng zawng zawng zinga 67.83% hi Maharashtra, Tamil Nadu, Karnataka, Andhra Pradesh leh Uttar Pradesh-a cheng an ni a, national average aia thihpui rate tlemna State leh UT 30 a awm mek bawk.

Enkawl dam rate sang ber chu Delhi bawk niin 85.63% an dam tawh a, Ladakh, Telangana, Haryana, Gujarat leh Assam-ahte chuan enkawl dam rate 71% aiin a sang bawk a ni. Maharashtra-ah ringawt hian hri kai 3,47,502 lai an awm tawh a, ni khatah hri kai sing dawn hmu chhuah thar awm lehin mi 12,854-in an thihpui tawh a, mi 1,40,395-in an la vek mek. Tamil Nadu-ah hian mi nuai 1.9 chuangin hri an kai tawh a, Delhi-ah mi nuai 1.2 chuangin hri an kai tawh bawk a ni.