NIT leh CFTI-a admission ti turte ngaihhnathiamna tichhuak

Central Seat Allocation Board (CSAB) chuan nimin khan National Institute of Technology (NIT) leh Centrally Funded Technical Institutions (CFTI)-a admission ti turte tan ngaihhnathiamna a ti chhuak a, heng institution-a admission ti thei tura class 12 board exam-a 75% hmuh ngai ṭhin chu a ngai tawh dawn lo a ni.

Union human resource and development minister Dr Ramesh Pokhriyal Nishank  chuan Joint Entrance Exam-Mains (JEE-Mains) 2020-a inziak tlingte chu admission an tih hunah class 12 board exam-a an mark hmuh aṭanga 75% an hmuh tlin kher a ngaih tawh dawn loh thu leh class 12 pass mark an hmuh chuan admission ti thei tura an tlin nghal mai thu a sawi. 

Hetianga hmalakna neih a nih chhan hi Covid-19 vang a ni a, he hri leng vang hian zirlaiten an zirlaiah duh angin an rilru an pe thei lo niin mi tam tak chuan an sawi. National Institute of Technology bakah Centrally Funded Technical Institutions-a admission ti turte chu a hma chuan JEE-Main-a an inziah tlin hnuah class 12-a an mark hmuh chu 75% a tling pha tur a ni a, qualifying exam-a top 20 percentile-te chu admission ti thei tura lak an ni ṭhin. JEE-Mains exam hi Covid-19 vangin vawi hnih sawn hlat a ni tawh a, September 1-6 inkar hian exam hi buatsaih an tum leh a ni.