I-Day lawmnaah school naupang tel dawn lo Covid-19 donaa hmatawngte sawm turin ti
Kumina Independence Day, August 15-a lawmna neih tur chu ram chhunga hripui leng avangin a hautak lo leh pungkhawm tam lo thei ang tura buatsaih tum a ni. Kum dangin I-Day lawmnaa tel turin school naupangte sawm a ni dawn lo a, palai sawm bik pawh nasa taka tihtlem a ni dawn bawk.
Sorkar laipui chuan state leh union territory-te hnenah, I-Day lawmnaah hian Covid-19 dona kawnga a hmatawngtu, doctor, health worker leh sanitation worker-te sawm chu thil tihawm tak tur a nih thu a hrilh. A lawmna pui ber, Red Fort-a neih tura pawh sawmna pekte chu tihtlem a ni dawn a, ṭhutna pawh feet ruk danah zel dah a ni dawn tih official chuan a sawi. Red Ford hi tihthianghlim leh Independence Day lawmna tura buatsaihna atan August 1 aṭangin mipui tlawh theih lohin khar a ni bawk ang.
Prime minister Narendra Modi chuan Red Fort-a Independence Day vawi 74-na lawmnaah hian hnam puanzar pawtpharhin thu a sawi dawn a ni. Rashtrapati Bhawan-ah 'At Home' programme pawh a neih a ni dawn a, mahse he hunah pawh hian Covid-19 norms chu khauh taka kenkawh a ni ang.
Ram chhunga hri leng a la hluar zel avangin home ministry chuan state leh union territory-te hnenah Indepence Day lawmna puala programme buatsaih dan turah pawh kaihhruaina te a duang a ni. Programme chu mipui tel tam lo thei ang tura duang tur leh, heng huna telte pawh chu social distancing dan zawm tur te, mask vuah vek tur te, intihthianghlimna lam ngaih pawimawh tur tea tih a ni. Hemi rual hian programme te chu a hmuna tel thei lo, mipui tam zawkin an lo hmuh theih tura web-cast-a ti turin a hriattir bawk.