Mumbai rel station-a innekbuainaah mi 22 an thi

Mumbai-a Elphinstone Railway Station-ah nimin zing khan mipui inpawngnekna a thleng a, mi 22 an thi a, midang 30 chuangin hliam na tak an tuar. Thi zingah hian hmeichhe pariat leh naupang pakhat an tel.

Station-a innekbuaina hi zing dar 10.46 vela thleng niin, station chhuahna lam foot-over bridge-a thleng a ni. Vanduaina thlenna hmun hi medical team chuan an pan nghal a, hliam tuarte pawh KEM hospital-ah hruai nghal an ni. Railway Minister Piyush Goyal chuan Elphinstone Road foot over bridge-a innekbuaina thleng avanga mi tam takin nunna an chan chu pawi a tih thu sawi a, hliam tuarte pawh an dam leh thuai a duhsak thu a sawi. Minister hi nimin khan Mumbai-ah hian a kal a, vanduaina thlenna hmun pawh hi tlawh nghal a tum a ni. Rel station-a innekbuaina thleng chu Chief Safety Officer, Western Railways kaihhruaina hnuaiah chhui chian a nih tur thu a puang nghal bawk.

Prime Minister Narendra Modi leh President Ram Nath Kovind-te pawhin vanduaina tawkte an tawrhpui thu an sawi. Ruahsur a sur nasat avangin ṭum dang aiin over-bridge-ah hian mi an tam zawk nia sawi a ni. Mi an tam avang hian lei hi a chim mai dawn niin mi ṭhenkhat an au a, hei vang hian mipuite hi an innekbuai zui ta nia sawi a ni. Hliam tuar zingah ngaihtuahawm tak tak an awm avangin thi zat hi an la punchhoh rin a ni bawk.

Chief Minister Devedra Fadnavis chuan inpawngneka thlenga thi chhungte chu cheng nuai nga-a ral an nih tur thu leh, hliam tuarte enkawlna senso pawh sorkar-in a tum vek tur thu a sawi. He thil thleng hi state sorkar leh railway ministry-in an chhui chian tur thu a sawi bawk.