Gujarat inthlanah VVPAT vek hman a ni dawn

Kumin kumtawp lama Gujarat Assembly inthlan neih turah, polling booth zawng zawngah Voter Verifiable Paper Audit Trail (VVPAT) system hman vek a ni dawn.

State Chief Electoral Officer BB Swain chuan polling booth 50,128-ah VVPAT hi hman vek a ni dawn tih sawiin, Gujarat voter-te chuan VVPAT hi an la hman ngai loh avang­in awareness drive pawh Election Commission-in a neihpui dawn tih a sawi. VVPAT machine tam zawk hi state chhungah hian a awmsa tawh a, a dang pawh thawnluh belh a ni thuai dawn niin, Swain chuan a sawi. EC chuan Gujarat-ah hian electoral roll revision pawh a nei fel tawh a, inthlana hman tur final roll a buatsaih mek a ni. Kum 2012 assembly inthlan aiin kumin inthlanah hian voter nuai 52 velin an pung a, voter awm zat hi vaibelchhe 4.33 an tling tawh a ni. Heng zinga nuai 10 hi nikum chhunga vote nei thar an ni.