India leh Afghanistan-te’n inremna ziak

India leh Afghanistan chuan police training leh tihmasawnna tura thawkdun turin inremna, memorandum of understanding (MoU) an ziak.

MoU hi India rama cham mek, Afghanistan Chief Executive Abdullah Abdullah leh Prime Minister Narendra Modi-te’n meeting an neih hnuah ziah a ni.

Meeting-ah hian PM Modi chuan Afghanistan-in an rama remna leh muanna a awm theihna atan a hmalaknaah India chuan theihtawpa puih zel a inhuam thute a hrilh a ni. Hruaitu pahnihte hian economic leh development lama thawhdunna zau zawk neih dan turte an sawi dun bawk. Abdullah chuan infrastructure development kalpuinaa India-in a puihna hrang hrangte chu lawmawm a tih thu a sawi. India hian Afghanistan ram hmasawnna tura a hnathawh hrang hrangah a pui nasa hle a, mahse sipai tirh luh erawh a tum loh thu a sawi. US Defence Secretary James Mattis pawhin kar hmasaa India a rawn tlawh khan, Afghanistan tana India inpeknate chu lawmawm a tih thu leh, Afghanistan ram security siamṭhatna leh democracy tundin kawngah tha thawh chhunzawm zel tura a duh thute a lo sawi tawh bawk a ni.