Congress President chuh tum mi 3 an awm ; Mallikarjun Kharge vs Shashi Tharoor a ni dawn

All India Congress Committee (AICC) President thlanna neih tura chuh tumte tan nimin khan nomination paper thehluh hun tawp a ni a, mi pathumin nomination paper an thehlut.

Party President chuh tum hian Rajya Sabha-a Leader of Opposition Mallikarjun Kharge, union minister hlui Shashi Tharoor leh Jharkhand minister hlui KN Tripathi-te chuan nomination paper an thehlut a ni. Tripathi hian inthlan hi chuh tum ve mah se thawm a nei lem lo a, hei vang hian he inthlan hi Kharge leh Tharoor-te inbitumna tur anga ngaih an ni. October 17-ah vote thlak a ni ang.

Union minister hlui Shashi Tharoor chuan a hmain party President dinhmun hi chuh a tum thu a lo sawi tawh a ni. Hetih lai hian Gandhi lamin an thlawp, Shashi Tharoor khing tura ngaih, Rajasthan chief minister Ashok Gehlot chu Chief Minister a nihna aṭanga a ban duh loh avangin a chuh ta lo a ni. Hemi hnu hian Digvijaya Singh chuan inthlanah chuh a tum thu a sawi ve leh a, mahse nimina nomination paper thehluh hun tawpah Singh hi inhnukdawk lehin, Mallikarjun Kharge zawk hian inthlan hi a chuh tum ta a ni.

Congress hian 'one person, one post' rule an kalpui avangin, Kharge hian Party President a chuh dawn avangin Rajya Sabha-a Leader of Opposition a nihna aṭangin a ban a ngai dawn a ni.

Ningani zan khan Congress veteran KC Venugopal chuan Kharge hi kawmin, party hotu lu ber pawhin inthlan hi chuh turin a duh tih a hrilh nia sawi a ni. Hetih lai hian Gandhi chhungkua chuan party hruaitu thar thlanna turah hian thlawp bik leh ṭan bik nei loin, neutral takin an awm dawn tih an sawi thung. Sonia Gandhi pawhin inthlan turah hian official candidate an awm hran dawn lo tih a sawi bawk.

Kum 2019-a party president a nihna aṭanga Rahul Gandhi a ban hnuah, Congress party hi full time president nei loin an la awm. Rahul Gandhi ban hnu hian a nu, Sonia Gandhi chu interim president in a awm a ni. Party president hi kum 20 chuang Gandhi chhungkuain chelhin, inthlan hi buatsaih a ni tawh lo bawk.

Party president hi Congress constitution-a Article XVIII hnuaiah thlan a ni dawn a, delegate 9,000 vel awmna, electoral college in a thlang dawn a ni. Inthlan result hi October 19-ah puan a ni ang.