AAP Gujarat co-incharge Raghav Chadha man tumin veh mek: Kejriwal

Delhi chief minister, Aam Aadmi Party (AAP) national convenor Arvind Kejriwal chuan an party hruaitu zinga mi, Raghav Chadha chu Gujarat political affairs co-incharge atan ruat a nih avangin agency lamin man tumin an veh leh mek niin a sawi.

Kejriwal chuan eng agency-in nge Chadha hi man tum a, eng thubuai nge siamsak an tum tih erawh a sawi lang lo.

Rajya Sabha MP, Chadha hi kumin kumtir lama Punjab assembly inthlanaah AAP hi hnehna an chan theihna atan khan a pawimawh hle a, hei vang hian assembly inthlan hmabak, Gujarat-ah party political affairs co-incharge atan tun hnaiah an ruat leh nghal a ni.

Kejriwal chuan Chadha chungchang hi nimin khan a twitter-ah tarlangin, "Gujarat co-incharge tana ruat a nih avang leh, inthlan neih tur atan campaign-ah a tel ṭan avangin Ragav Chadha man an tum tih thawm kan hria a ni," a ti.

Thawhlehni khan Central Bureau of Investigation (CBI) chuan AAP media communication in-charge Vijay Nair leh Delhi excise policy kaihhnawih an lo man leh tawh bawk. Kerjiwal chuan hemi chungchangah hian BJP kaihhruai sorkar laipui chu na taka sawiselin, BJP chuan Gujarat assembly inthlan lo awm turah chak loh a hlauthawng tawh a, hei vang hian thu dik tawk lo hmagin AAP hruaitu tupawh chu man leh, jail-a khung mai theih dinhmunah an ding vek a ni, tiin a sawi. Nair chu AAP worker niin, excise policy chungchangah engmah inhnamhnawihna a nei loh thu a sawi bawk.