BSF-te’n Jammu-ah leiverh hmuchhuak

Border Security Force (BSF)-te chuan Jammu and Kashmir, Arnia sector-a international border-ah leiverh, feet 14-a thui an hmuchhuak.

Leiverh hi Arnia sector-a Damala Nalah ramhnuaiah hmuh a ni a, leiverah hian firfiak leh construction worker-te an awm nia sawi a ni. He leiverh hi Pakistan firfiakten India ram luhrukna atan hman an tum niin BSF chuan a sawi.

BSF-te hian Inrinni khan Damala Nalah-a Pakistan mi 10-12 inkarte chetdan chu ringhlelin an umzui a, Pakistan lam aṭangin rawn kap mah se ramri bulah hian an umzui a ni. Paksitan mite hi BSF mi leh sate an hmuh hian an tlanchhe nghal a, sipaite hian an awmna bul vel an enfiah hnuah lei verh la zawhfel loh, feet 14-a thui, feet 3-a sang leh feet hnih leh a chanve-a zau hi an hmuchhuak ta a ni.

Arnia sector-ah hian September 13-17 inkar khan Pakistan sipaite chuan India lam hawiin silai an hmetpuak fo a, hei hi leiverh hna thawh a nih theih nan leh, he leiverh aṭanga firfiakten India an luh theihna tura an lo thup leh puih tumna nia ngaih a ni. Hei hi kumin chhunga sipaiten leiverh an hmuhchhuah pahnihna a ni a, February 13 khan Ramgarh sector-ah an lo hmuchhuak tawh bawk a ni.

Security force-te chuan Arnia sector-a leiverh an hmuhchhuahna bulah hian AK-47 magazine pahnih, hand grenade, Duracell batteries leh pencil cell, sleeping bag pali, leh head lamp te an hmu tel bawk.