RSS hotuin Rohingya-te awm duh loh chhan sawi

RSS hotu, Mohan Bhagwat chuan Rohingya Muslim-te chu tharum thawh ching, firfiak pawlte nena inkungkaihna nei an nih avangin India ramah an awm a rem lo niin a sawi.

Nagpur-a Dussehra pual­a inkhawm buatsaiha thu a sawiah RSS hotu chuan he thu hi a sawi a, Bangladesh aṭanga dan loa rawn lutte avanga India-in harsatna a tawh mek laiin, Rohingya-te avanga harsatna tawh belh chu thil ṭha lo tak a nih thu a sawi. He inkhawmah hian BJP hruaitu hlun LK Advani leh Union Minister Nitin Gadkari-te pawh an tel a ni.

External Affairs Ministry thupuangtu, Raveesh Kumar chuan Bangladesh sorkar nen Rohingya te chungchang hi sawi dun reng a nih thu a sawi a, Rohingya te vanga buaina pawh chu chinfel thuai beisei a nih thu a sawi. Hei bakah hian Myanmar security force leh Rohingya Muslim-te inkara inbeihna thlenna, Myanmar-a Rakhine state-a Hindu mi tam tak ruang chhar a nih chung­chang pawh chhui chiang tura Myanmar sorkar ngen a nih thu a sawi bawk.