Congress President election : Candidate 2-te an campaign ṭan

All India Congress Committee (AICC) president thlanna neih tura nomination paper thehluttu pathum zinga pahnih, Mallikarjun Kharge leh Shashi Tharoor-te nomination-te pawm a ni a, Jharkhand chief minister KN Tripathi nomination erawh hnawl a ni.

Party hruaitu thlanna turah candidate pahnihte hi an campaign ṭan nghal a ni.

Shashi Tharoor chuan tun hnaia British Conservative Party hruaitu thlanna neiha an tih angin, mipuiten an party an ngaihvenna tharthawh leh turin candidate pahnihte chu public debate neih a rawt. Congress party member thinlungah Nehru-Gandhi chhungkua chuan hmun pawimawh tak changin, an chang zui reng dawn a ni, a ti.

Candidate pakhat zawk, senior leader Mallikarjun Kharge chuan Gandhi chhungkuaten inthlan hi chuh an tum loh avangin, senior leader dangten chuh tura an tih avanga chuh a nih thu a sawi a, mimal inbeihna ang ni loin, Congress party ideology tundin zelna turin a bei tih a sawi ve bawk.

Congress party hian 'one man one post' rule an kalpui avangin, Kharge hian inthlana chuh tura nomination paper a thehluh hnuah Rajya Sabha-a Leader of Opposition a nihna aṭanga banna a thehlut tawh a ni.

Party president thlanna neih tura a tir lama hming langsar, Rajasthan cheif minister Ashok Gehlot chuan Kharge chu Cognress party tichak tura tawnhriat ṭha tak a nei a ni, a ti a, mi rilru ṭha tak niin Dalit hnam a nih avangin inthlan a chuh ve hian midangte pawh a tilawm a, a chak ngei a rin thu a sawi. Shashi Tharoor pawh mi ṭha tak leh rilru chak tak a ni tih a sawi bawk a, mahse ani chu elite class a ni, a ti.