Maharashtra official-te 'hello' tih aiah 'Vande Mataram' hmang turin ti

Maharashtra sorkar chuan sorkar hnathawk leh official-te chu official leh mimal phone call an dawnin, 'Hello' tih aiah Vande Mataram' tih hmang turin a ti a, hemi puala campaign hi nimin khan a hawng.

Wardha district-a rally neihah state cultural affairs minister Sudhir Mungantiwar chuan he campaign hi hawngin, 'Vande Mataram tih hian kan nu ber hmaah zahna lantirin kan kun tihna a ni a, mipuite pawh Hello tih aia Vande Mataram tih hmang vek turin kan ngen a ni," a ti.

Inrinni liam ta khan hemi chungchangah hian Government Resolution (GR) tihchhuah a ni a, tihluihna ni lo mah se, department hotu tinte chuan an staff-te chu Vande Mataram tih hmang turin an fuih tur a ni, a ti. 'Hello' tih chu khawthlang lam culture a ni a, awmzia mumal tak pawh nei lo a ni tiin GR chuan a tarlang.

Mahse 'Vande Mataram' tia phone-a betute lo chhawn chuan rilruah inpawhna a siam nghal dawn a, chawilar a nih theihna turin awareness campaign pawh buatsaih a ṭul thu a tarlang bawk.