Sorkarin tele-mental health programme hawng dawn

Sorkar laipui chuan national tele-mental health programme siam a tum a, mental health lama puihna mamawhte tan ram pum huapin a thlawna biak theihna tur helpline number siam a tum bawk.

Union budget 2022-23 a pharh ṭum khan union finance minister Nirmala Sitharaman chuan national tele-mental health programme (NTMHP) siam a nih tur thu hi a lo puang tawh a ni.

Sitharaman chuan, "Hri leng in mi hrang hrang rilru lam thlengin a nghawng thui hle. Rilru lam hriselna ṭha zawk neihna tur zirtirna leh enkawlna tur 'National Tele-Mental Health Programme' siam a ni dawn a ni," a ti. He programme siamtur hian tele-mental health centres of excellence 23-te a huam tel dawn a, National Institute of Mental Health and Neurosciences (NIMHANS) chu nodal centre niin, International Institute of Information Technology, Bengaluru (IIITB) in technology lamah a pui ang.

Programme peng pakhat atan state leh union territory tinah tele-MANAS (Tele-Mental Health Assistance and Nationally Actionable Plan) cell siam a ni ang a, regional coordinating centre panga dah a ni bawk ang.

Toll-free helpline number dahin, hetah hian be duhten an ṭawng hman duh an thlan theihna pawh siam a ni dawn bawk a ni.

India ramah Covid-19 hri leng vangin kum 2020 khan depression leh anxiety disorder nei hi 35% velin an pung niin nikuma Lancet zirchianna neih chuan a tarlang. Kum 2020 khan a hma kum aiin mahni intihlum 10% in an pung bawk.

AIIMS-a professor of psychiatry, Dr Rajesh Sagar-a'n a zirchianna neih a tihchhuahah, India ramah mental health problem a nasa a, mi pasariha mi pakhat zel chu mental disorder vanga harsatna nei angin a chhut a ni. Hei bakah hian Covid-19 hri leng khan direct leh indirect-in ram pum mipuite mental health-ah a ṭha lo lamin nghawng a nei bawk a ni, a ti.