Modi sawichhiaa puh Dhinakaran thubuai siamsak

Tamil Nadu-a AIADMK hruaitu TTV Dhinakaran chu Prime Minister Narendra Modi leh Tamil Nadu Chief Minister K Palaniswami-te sawichhiat­na lehkha semah puhin thubuai siam­sak a ni a, Dhinakaran-a zuitu mi 10-te chu man an ni bawk.

Thawhṭanni khan mi pakhat, Vinayakam inti chuan complaint thehlutin, Dhinakaran leh a zuitute hian CM Palaniswami-an meeting a neihna hall pawn lamah PM leh CM sawichhiatna pamphlet hi mipui zingah an sem niin a sawi. Complaint a thehluh hnu han mi 10 man an ni a, an zingah hian MLA hlui Venkatachalam leh local AIADMK hruaitu Saravanan te pawh an tel.

Dhinakaran leh amah thlawptu MLA 18 te chu Tamil Nadu-a AIADMK sorkar laka an hel avangin Assembly speaker chuan tunhnaiah anti-defection law hnuaiah MLA an nihna aṭangin a lo ban tawh a ni.

Tun ṭum hi state police-ten Dhinakaran-a lakah thubuai an ziahluh ṭum hnihna a ni. A hmain party MP P Kumar chungchang mawi lo taka a sawi vangin thubuai siamsak a lo ni tawh bawk.

Dhinakaran chuan CM Palaniswami chu Home portfolio a chang a, police hotu ber a nih tel avangin a lakah thubuai siamsak a ni tih a sawi. Tamil Nadu sorkar chu a tluchhe dawn tawh nia sawiin, hei vang hian CM chuan police minister a nihna chu dik lo takin a hmang a ni, a ti. Sorkar chu a duh angin che mah se, AIADMK thlawptute leh state mipuite chuan sorkar chu an la paithla dawn tho niin a sawi.