Journalist ten Tharum thawhna do

Journalist-te chu Thawhlehni khan Press Club of India, New Delhi kawtah pungkhawmin, journalist-ten beih leh vau an tawh ṭhin duh lohna an lantir.

Press Club of India kawta reporter leh editor tam tak kalkhawmte chuan tunhnaia media mite laka tharum thawhna thleng ṭhin an duhlohna lantir in, Union Home Minister Rajnath Singh lakah hemi kaihhnawiha case pending zawng zawnga report awmdan an hriat duh thu an sawi.

State Press Club te buatsaihin state khawpui hrang hrang 20 ah pawh journalist-te laka tharum thawh duhlohna lantirna hi neih a ni bawk.

Journalist kalkhawmte hi inkaikual in Press Club of India hi an kal hual a, ramchhung hmun hrang hranga state press club te chuan a rualin October ni 5 hian New Delhi ah memorandum thehluh an tum. Hemi rual hian an state sorkar ṭheuhah pawh memorandum hi thehluh an tum bawk a ni.

Thla khat dawn kalta khan journalist Gauri Lankesh chu Bengaluru-a ama chenna in kawtah thah a ni a, a hnu lawkah reporter Shantanu Bhowmick pawh Tripura ah thah a ni leh bawk. Bhowmick-a thattu hi man a nih tawh a, Lankesh thattu erawh hi chu man a la nilo thung. Hemi hnu hian Delhi-NCR vela reporter thenkhat ten tu tih hriatloh atangin WhatsApp kaltlangin vauna an dawn thu an sawi bawk a ni.