PM-in HP-ah AIIMS lungphum phum
Prime Miniter Narendra Modi chuan nimin khan Bilaspur, Himachal Pradesh-ah All India Institute of Medical Sciences (AIIMS) lungphum a phum.
Khum 750 awmna hospital hi cheng vaibelchhe 1,350 senga sak a ni dawn a, medical college niin graduate leh post-graduate level thleng zir theih a nih bakah, nursing pawh a zir theih nghal dawn a ni.
AIIMS lungphum phumna puala inkhawm buatsaihah hian Chief Minister Virbhadra Singh, Governor Acharya Dev Vrat leh union minister JP Nadda-te an tel. PM chuan AIIMS chu Himachal Pradesh mipuite an chhawr ṭangkai dawn hle tih sawiin, he campus-ah hian hnathawktu mi 3000 vel an awm dawn a, hna thar siamna remchang tak pakhat pawh a ni tel a ni, a ti.
PM hian Una-a Indian Institute of Information Technology (IIIT) leh Kandrori-a steel plant a hawng nghal bawk a, Himachal Pradesh assembly inthlan neih tur atana BJP poll campaign bul ṭanna a neihpui bawk. Campaign hawnna inkhawm hi Bilaspur-ah neih a ni a, hei hi BJP chief minister candidate atana rinkai, Union Health Minister JP Nadda-te khua a ni.