UP-a Puja pandal kangah mi 5 an thi a, 60 chuang an hliam

Uttar Pradesh-a Bhadohi-a Durga puja pandal siamah Pathianni zan khan kangmei nasa tak a chhuak a, mi panga an thi a, mi dang 66 in hliam an tuar. Thi zingah hian naupang pathum an tel.

Kangmei hi zan dar 9 velah, Navratri festival ni sarihna, 'Saptami' pual aarti an hmanna hmun aṭangin a chhuak. Kangmei chhuah lai hian pandal chhungah mi 150 vel an awm niin police-te chuan an sawi.

District magistrate Guarang Rathi chuan halogen light sa lutuk vangin electric wire chu hmun eng emaw zatah a kang niin a sawi, pandal chhunga thinga siam, platform chu a kangkai zui ani, a ti. SP Anil Kumar chuan Aurai police station-ah FIR ziahluh a nih nghal thu a sawi bawk.

Chief minister Yogi Adityanath chuan kangmei chhuaka nunna chan chhungte a tawrhpui thu sawiin, district official-te hnenah damdawi-ina hliam tuar enkawl mekte chu tlawh a, enkawlna ṭha tak an dawnna tura hma la turin a hrilh.